tabkhe.com tabkhe.com
random

آخر الأخبار

random
جاري التحميل ...

بسيطلات بالدجاج و اللوز

 بسيطلات صغار بالدجاج و اللوز.
المقادير:
دجاج تقريبا كيلو و نصف مزول ليه الجلدة ديالو و مغسول مزيان و نخليوه يقطر، 4 حبات كبار ديال البصلة البيضة مشلظة، القزبور و المعدنوس و تكون كمية المعدنوس اكثر من القزبور، 2 عواد ديال القرفة، معلقة كبيرة ديال السمن، معلقة كبيرة ديال عطرية الدجاج (تباع عند العطار)، معلقة صغيرة قرفة، 2 ضروس الثومة محكوكين، 2 معالق كبار زيت نباتية. باش غنعسلوا كنحتاجوا 2 معالق كبار الزبدة، 2 معالق كبار سكر سنيدة، 2 ساشيات ديال زهرة البرتقال (اللي في الصورة يباع عند المحلات اللي كتبيع كل مايتعلق بالحلوى)، 2 معالق كبار عسل حر، الملح، 300 الى400 جرام لوز (مصلوق و نفسخوه و نخيه حتى ينش ثم نقليوه و نهرمشوه غير شوية)، 2 معالق كبار بودرة اللوز.
نتمنى تابعوا الطريقة تدريجيا. كناخدوا طنجرة كنوضعوا فيها الدجاج ديالنا و نوضعوا عليها اولا المعلقة الكبيرة ديال السمن ثم المعلقة الكبيرة ديال عطرية الدجاج ثم الضريسات ديال الثومة اللي عندنا ثم الزوج عويدات ديال القرفة ثم نزيدوا القزبر و المعدنوس اللي عندنا ثم نزيدوا شوية الملحة و نضيفوا الزيت و نوضعوا الطنجرة فوق العافية نخليوا الدجاج ديالنا يتشحر مع التحريك و من بعد ما يتقلى لينا الدجاج مزيان كنضيفوا البصلة المشلظة اللي عندنا و نخليهم يتقلاو مع بعضهم شوية و مرة مرة نحركوا ومني تبان لينا البصلة بدات تذبال ثم نضيف عليهم ربع كأس ديال الماء مغلي فقط لان كيف كنعرفوا البصلة كطلق الماء ديالها و كنغطيوا الطنجرة ديالنا و نخليوه يطيب تقريبا مدة 40 دقيقة و من بعد ما كنلاحظ ان الدجاج طاب كنزولوه من الطنجرة و كنفرتوه لقطع متوسطة و المرقة اللي عندنا في الطنجرة اللي طاب فيها الدجاج كنضيفوا ليها بودرة اللوز اللي عندنا فالمقادير و الزوج معالق ديال العسل الحر و نزيدوا القرفة المطحونة و نخلطوا و كنخليوا المرق حتى كينشف مزيان من الماء و يختر لينا و من بعد كنضيف ليه الدجاج اللي قطعنا و نخلطوهم مع بعضهم .
في مقلة كنوضعوا 2 معالق كبار الزبدة و نذوبهم و نضيف عليهم زوج معالق كبار ديال سكر سنيدة تم نزيدوا زوج ساشيات ديال زهرة البرتقال و نحاول نحرك شوية هاد المقادير نمزجهم مع بعض تم نضيف عليهم اللوز اللي كنا قلينا و هرمشنا و نبداو نحركوا حتى يولي داك اللوز مكراميليزي و نزولوا من فوق النار(متياخدش بزاف الوقت باش يتكراميلي).
نمشيوا للمونطاج كناخدوا جبانيات كنوضعوا فيهم ورقة البسطيلة نلبسوهم لدوك الزليفات بحيت البلاصة اللي كتبان لينا مدهونة في الورقة هي اللي كتكون على برا تم ناخد غير طرف صغير من الورقة او دائرة صغيرة نحاول نوضعها في الوسط ندوبلي بهيا الورقة باش ماتخرجش لينا الحشوة تم ندهنوا القرة من الوسط و الجوانب بشوية الزبدة مدوبة تم كنوضعوا طبقة ديال اللوز اللي كراميلنا هو الاول و من بعد نوضعوا طبقة ديال الدجاج و البصلة و نجمعوا البسطيلة ديالنا و نقلبوها تم نوضعوها في لاطة مدهونة بالزبدة مدوبة و ندهنوا البسيطلات ديالنا بشوية ديال الزبدة مدوبة كدلك و ندخلوهم للفرن على عافية مهيلة حتى يطيبوا على خاطرهم و مني تحمر لينا الورقة ديالنا و نخرجوهم من الفران ممكن نزوقوهم من الفوق بشوية العسل ندهنوهم بيهم من الفوق و شوية اللوز مقلي و مهرمش و البعض نزوقوهم بالسكر كلاصي و شوية القرفة و حبات من اللوز.
و بالصحة و الراحة احبائي😋😘

عن الكاتب

Bbl

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

جميع الحقوق محفوظة

tabkhe.com